Nakasugtan sang mga alkalde sa Metro Manila nga siraduhan ang mga patyo sa tigkalalag agud malikawan ang pagtilipon kag ang posible paglaton sang coronavirus disease 2019 (COVID-19).
Suno kay Metro Manila Development Authority (MMDA) General Manager Jojo Garcia, ini ang nangin desisyon sang mga local executives sang National Capital Region (NCR) apang natalana pa nga irelease ang guidelines.
Ang guidelines ang magalakip sang rerouting sang mga salakyan kag ang petsa nga sakop sang closure sang mga patyo.
Nahibaluan nga antes sang nakasugtan sang mga alkalde subong nga adlaw, Setyembre 13, una na nga naka-anunsyar ang local government units (LGUs) sang Manila, San Juan, kag Mandaluyong nga siradhan ang mga patyo nga sakop sang ila mga lugar.
Ini ang labing-una nga tion sa recent history sa Pilipinas nga may pagpasirado sa mga patyo ilabi na bangud nangin tradisyon na sang mga Pilipino ang pagpadulong sa patyo kun Nobyembre 1 ukon All Saints’ Day kag Nobyembre 2 ukon All Souls’ Day agud magbisita sa ila mga himata kag abyan nga napatay kag agud magpangamuyo. #
