Nadakpan na sang mga otoridad ang walo sa napulo ka mga Persons Deprived of Liberty (PDLs) nga nagsipalagyo sa Batangas Provincial Jail sa Brgy. Malainin, Ibaan, Batangas, sa ginpatigayon nga hot pursuit operation, samtang ang duha padayon nga ginapangita.
Suno sa mga otoridad, ginalauman nga ang ginareklamo nga inhumane treatment ukon malain nga pagtrato sang mga jail guards ang nagtulod sa mga PDLs nga magpalagyo pasado alas-9:30 sang aga. Base sa imbestigasyon, isa sa mga PDL ang nagtawag sa jail guard samtang naga preparar ini sang pagkaon, gin-agawan sang pusil kag ginhana sang balisong antes ginkuha ang yabe kag ginpreso pa mismo ang jail guard sa selda.
Tatlo ka PDL ang nadakpan sa malapit nga katalunan pinaagi sa drone operation, samtang lima ang nagtiner sa Alps bus nga pa-Cubao halin sa San Juan. Nakabaton sang alerto ang driver nga si Angelito Alcantara halin sa bus inspector, gani ginpaliko sini ang bus sa Sto. Tomas City kun sa diin ginlibutan sang kapulisan. Ginpangayo sang mga PDL nga may media present antes sila boluntaryo nga nagsungka matapos ang kapin 20 minutos nga negosasyon.
Wala sang ginreport nga nasamaran sa insidente, kag narekober sang mga pulis ang isa ka 9mm pistol, bala, balisong kag P59,000 nga kwarta. Duhá sa mga nadakpan nga PDLs ang nagbuyagyag nga ginalikupan sila sang pagpangbuno kag pangabuso sa sulod sang prisohan, gani nagapangabay sila nga indi na ibalik sa Batangas Provincial Jail. Ginsugo na ni Governor Vilma Santos-Recto ang imbistigasyon matapos sang insidente, samtang padayon ang manhunt sa duha pa ka PDL nga nakapalagyo.
