Pahamtangan sang rumble strips ang tanan nga mga pedestrian lanes sa palibot sang syudad sang Iloilo.
Sa interview sang Bombo Radyo Iloilo kay Mr. Jeck Conlu sang Public Safety and Transportation Management Office (PSTMO), iya ginpahayag nga ini ang isa sa mga solusyon agud malikawan ang pagluntad sang aksidente kaangay sang natabo sa mag-asawa nga Joe Marie kag Alnie Dinah Osano nga nabungguan-patay sang Mazda MX5 sports car sa pedestrian lane sa Senator Benigno Aquino Jr. Avenue, Mandurriao, Iloilo City.
Suno kay Conlu, magluwas sa Senator Benigno Aquino Jr. Avenue, ila tumuron ang mga pedestrian lane nga pahamtangan sang rumble strips sa pinakamadali nga panahon.
Samtang, gin-ako naman ni Conlu nga wala nangin epektibo sa mga motorista ang una nga rumble strips nga ginpahamtang sa Senator Benigno Aquino Jr. Avenue bangud manipis rason nga ila ginpadamol agud mas mapilitan nga magbahar ang mga salakyan samtang nagapalapit sa pedestrian lane.
May iban man suno kay Conlu nga nagakasal-an nga pedestrian lane ang rumble strips gani may mga personnel sila nga nagagiya sa mga tawo nga nagatabok sa dalan.
