ILOILO CITY – Ginpaandaman sang kapulisan ang mga nagatago sang ginapahayag mga high-powered firearms sang napatay nga top drug lord sang Western Visayas nga si Richard Prevendido.
Ginpahayag sa Bombo Radyo ni Iloilo Provincial Police Office (IPPO) director S/Supt. Marlon Tayaba nga amu man ang ground commander sa operasyon batok kay Prevendido, wala marekober ang mga armas sa puluy-an sa Barangay Balabago, Jaro, Iloilo City kun sa diin nakorner ang drug lord.
Panawagan ni Tayaba sa mga nagatago sang mga armas ni Prevendido nga i-surrender na ini kun indi luyag nga manabat sa layi.
Apang posible man suno kay Tayaba nga ginbilin ni Prevendido sa iya sub-group leader nga si Ernesto Bolivar ang mga high-powered firearms ukon sa iban pa nga downline sang drug lord.
Ginahibalo man sang kapulisan kun ginbilin ini ni Prevendido sa iya pamilya.
Una na ginpahayag sang Police Regional Office 6 nga 15 sa mga miyembro sang pamilya ni Prevendido, ang involve sa illegal drug trade.