Temprano pa nga ginpapauli ang mga personnel sa Iloilo City Hall bangud sa power failure halin pa kagab-i.
Sa public advisory nga ginpaguwa sang Iloilo City Government, nakasaad nga tubtub gid lamang sa 10:30 sang aga ang oras sang trabaho subong nga adlaw, Agusto 8, bangud sa kapalpakan sa suplay sang kuryente kag pasundan pa sang subsequent disinfection nga himuon sang City Health Office sa hapon.
Maga-resume ang office hours buwas, Agusto 9.
“Please be informed that Iloilo City Hall will have shortened work hours today (until 10:30am only), Aug. 8, 2024, due to power failure in the building and subsequent disinfection to be done by the City Health Office in the afternoon. Regular office hours will resume tomorrow. Thank you for your kind understanding,” kabahin sang abiso.
Base sa inisyal nga impormasyon sang Bombo Radyo, kagab-i pa nagsugod ang problema kag ginapatihan nga “internal problem” man ang natabo nga ginrespondehan naman sang More Electric and Power Corporation.
Ginapahayag man nga may na-trap pa sa elevator kaina sang aga bangud sa sini nga sitwasyon.
Wala man gingamit ang generator set bangud kinahanglan tultulon kun sa diin naghalin ang problema.
As of press time, wala pa nagbalik ang normal nga suplay sang kuryenrte. Ginahibalo pa kun ano ang ginhalinan sang nasambit nga power failure.
