ILOILO CITY- Padayun nga ginapaidalom sa quarantine sa talatapan sang Bureau of Jail Management and Penology Region 6 ang 91 ka ‘posible’ contact sang jail officer nga nagpositibo sa coronavirus disease 2019 (COVID-19).
Sa interview sang Bombo Radyo kay Bureau of Jail Management and Penology 6 Director for Administration Gilbert Peremne, iya ginpahayag nga istrikto man ang ginahimo nga pagmonitor sa mga personnel.
Suno kay Peremne, tagsa ka adlaw ginamonitor ang ila body temperature sang katapo man sang ila health unit, lakip na ang paghatag sang ila tagsa ka mga kinahanglanon samtang naka-quarantine.
Pahayag pa sang opisyal, estable man ang kondisyon sang tanan, apang sa subong, padayun sila nga nagahulat sang ila schedule sa pagpaidalom sa COVID-19 test.
Gin-athag man ni Peremne nga wala sang driver ang ila bag-o nga regional director sang nag-abot ini sa Iloilo bangud siya mismo ang nagamaneho sang iya salakyan.
Sa subong suno sa natungdan, yara na sila sa ika-47 nga adlaw sang ila lockdown kag wala sila sang nangin problema sa 38 ka pasilidad nga yara sa bug-os nga rehiyon.
