ILOILO CITY – Indi dapat nga mag-panic ang mga Pilipino sa ginapanan-aw nga P15.8 trillion nga utang sang Pilipinas sa katapusan sang 2024.
Sa ginpatigayon nga hearing sang Senate Finance Committee may kaangtanan sa national budget para sa 2024, ginpahayag ni Senator Ronald “Bato” dela Rosa nga indi kinahanglan mag-panic sang mga Filipino bangud nga utang lamang ini.
Kun balik-balikan, ginpahayag ni National Treasurer Rosalia de Leon nga ginapanan-aw nga magsaka pa tubtob sa P15.8 trillion ang utang sang Pilipinas sa 2024.
Ini ang ginpahayag sang opisyal sang ginpamangkot ni Senate Minority Leader Aquilino “Koko” Pimentel III ang projected level sang utang sa katapusan sang masunod nga tuig.
Suno kay de Leon, may ginpa-in na nga P1.9 trillion para sa debt principal kag interest payments para sa 2024, kun sa diin, ang P1.2 trillion ang gin-designate para sa pagbayad sang principal debt kag P670.5 billion para sa pagbayad sang interest.
Ginkwestiyon naman ni Pimentel ang mga economic managers nga daw kaangay nga wala nagakabalaka sa nagatimbu-ok nga utang.
Suno kay de Leon, ang profile ukon ang structure sang utang sang Pilipinas ang tuman ka baskog.
Pahayag naman ni Finance Secretary Benjamin Diokno, ang debt-to-gross domestic product ratio sang Pilipinas ang yara pa sa gihapon sa “manageable range.”
Ginhalimbawa pa niya ang Japan kag United States nga may halos 300% kag 200% nga debt-to-gross domestic product ratio.
Sa subong, ang utang sang Pilipinas ang nagdangat na sa bag-o nga record high nga P14.15 trillion.
