YOKOHAMA,TOKYO – Pagaistoryahan pa sang Technical Working Group ang iban nga detalye may kaangtanan sa repatriation sang mga Pilipino nga sakay sang Diamond Princess cruise ship nga nag dungka sa Yokohama, Japan.
Madumduman nga ginkumpirma ni Department of Health Secretary Francisco Duque III nga mangin mas temprenao ang pag abot sang mga Pilipino nga magaparepatriate bangud sa COVID-19 nga nakatalana na sa Pebrero 23.
Base sa datos sang Department of Foreign Affairs, 538 ang numero sang mga Pilipino nga sakay sang nasambit nga cruise ship sa diin kalabanan sa ila ang miyembro sang crew.
Apang suno kay Duque, wala pa sang pinal nga numero kun pila ang maabot sa Pebrero 23.
Dugang sang natungdan, nakigsapol na si Department of Interior and Local Government Secretary Eduardo Año sa Inter-Agency Task Force agud ipalab-ot sa Local Government Unit ang plano nga sa New Clark City i-quarantine ang mga magapauli nga Pilipino.
Sa ginpalab-ot nga impormasyon sang Japanese health authorities sa Department of Health, 41 ka mga Pilipino nga sakay sang cruise ship ang nagpositibo sa COVID-19.
