ILOILO CITY- Labi pa nga naglala ang kaso sang anti- immigrants violence sa nagkalain-lain nga parte sang United Kingdom kag ginakabig ini nga pinakamalala nga sahi sang pagpang-atake batok sa mga dumuluong sa sulod sang masobra isa ka dekada.
Suno kay Bombo Steven Mark Espinosa, international correspondent sa United Kingdom, ang paglupok sang amo nga anti- immigrants violence ang kasunod sang isa man ka anti-immigrant misinformation campaign nga tuga sang insidente sang pagpangbuno sa isa ka dance class sa Southport, northern England kun sa diin tatlo ka mga bata ang napatay.
Ginpahayag ni Espinosa nga may pila ka Filipino nurses nga nagatrabaho sa National Health Service ang wala man ginpalampuwas sa kalakasan matapos ginpanghaboy sang bato ang mga ini sang mga rioters.
Sa subong, yara na sa 370 ka tawo ang naaresto kasunod sang nasambit nga pagpang-atake ilabi na sa mga immigrants.
Matandaan nga kasunod sang knife attack, naglapta ang sala nga impormasyon sa insidente nga nagasiling nga ang 17-anyos nga suspek ang isa ka immigrant, nga gilayon nagresulta sa anti-Muslim kag anti-immigrant protests.
Gin-athag naman sang otoridad nga ang suspek ang ginbun-ag sa Britanya.
