Nag-abiso ang Malacañang sa mga Pilipino sa California sa Estados Unidos sang Amerika nga magpabilin nga alerto pananglitan maglunsar sang pag-atake ang Iran sa state bilang pagbalos sa naga-ibwal nga tensyon sa Middle East.
Kasunod ini sang advisory halin sa Federal Bureau of Investigation (FBI) kag nagpahibalo sa kapulisan sa California nga ginpahayag nga nagtuyo ang Iran nga magpalupad sang mga unmanned aerial vehicle (UAV) pakadto sa mga wala ginsapubliko nga target sa amo nga state sang Pebrero.
Nagpaandam man ang FBI nga posible pa gid nga may surprise attack ang Iran sa palaabuton.
Suno naman sa Presidential Communications Office (PCO) sang Malacañang, ang nagapanguna nga prayoridad sang gobyerno amo ang kaluwasan sang mga Pilipino sa iban nga pungsod.
Pahayag sang opisina, magahimo sang repatriation ukon pagpapauli sa ila sa Pilipinas kun kinahanglanon.
Dugang ni Palace Press Officer Atty. Claire Castro, dapat seryosohon ang mga impormasyon nga nagaalin sa mga law enforcement agencies sang United States.
“Kapag may ganiyan na mga impormasyon, kailangan din maghanda ang ating bansa para sa ating mga kababayan,” suno kay Castro. “Hindi po ito maaring ipagsawalang bahala o tulugan.”
Ginabanta nga 1.6-million ka mga Pilipino ang nagapuyo sa California kun sa diin 500,000 ang nagatinir sa Los Angeles samtang 290,000 ang yara sa San Francisco.
Una naman nagpahayag si California Gov. Gavin Newsom nga wala sang imminent threat sa state apisar sang warning halin sa FBI nga maghimo magpalupad ang Iran sang drones sa West Coast bilang kabahin sang ila nga pagtimalos.
“We’ve been aware of that information. … It’s all about a posture of preparedness for worst-case scenarios,” pahayag ni Newsom.
