ILOILO CITY – Wala mabatas ni Presidente Rodrigo Duterte ang kapin 200 ka mga Pinoy nga naghulat sa atubang sang iya hotel sa Tokyo, Japan kagab-i.
Ginpahayag ni Bombo Radyo international correspondent Josel Palma nga pagkatapos sang panyapon nila ni Japanese Prime Minister Shinzo Abe, ginhingyo ni Duterte sa mga security nga pasudlon sa iya hotel ang 20 ka mga lider sang mga Pinoy nga naghulat sa iya sa guwa sang hotel.
Apang indi man mapahamtang ang Presidente nga indi maatubang ang iban pa rason nga nagguwa ini sa hotel kun sa diin naka-selfie ini sang mga Filipino kag nagpirma pa sang autograph.
Suno kay Palma, ang pila sa mga naghulat ang nagikan pa sa malayo nga mga lugar kag nag-check-in sa hotel kun sa diin nagatinir si Duterte, agud makita ang presidente.
Ginabantayan naman sang bug-os nga Japan ang natalana nga pag-atubang ni Presidente Duterte subong nga hapon kay Japan Emperor Akihito.
Suno kay Palma, kinahanglan nga maghalong si Presidente Duterte bangud sang madamo nga mga protocols nga dapat sundon sa pag-atubang sa Emperor.
Nagakahangawa ang Japanese officials sa natalana nga meeting bangud sa gestures sang Presidente.