Limitado subong ang hulag sang mga Pinoy sa Syria sa tunga sang nagapadayon nga tensyon matapos ang pag-agaw sang mga rebelde sang poder gikan kay Presidente Bashar al Assad.
Base sa deklarasyon sang Syrian rebels, gintapos na nila ang 24 ka tuig nga pagginahum kag diktadorya ni al- Assad.
Si al-Assad ang nagpalagyo kag nagpadulong sa Russia.
Suno kay Bombo International Correspondent Nenita Calambro direkta sa Damascus, Syria, nag-abiso ang Philippine Embassy sa mga Pinoy nga likawan anay ang maggwa sa samtang wala pa nagbalik sa normal ang sitwasyon.
Ginpahayag ni Calambro nga may mabatian pa sila nga mga lupok sang pusil kag bomba kag maswerte nga wala gid matandog ang ila ginaistaran.
Dugang niya, sa subong,nagaamat-amat na nga nagatahaw ang linukpanay kag kinagamo.
Samtang ginpahayag naman ni Calambro, may yara man sang isa ka Pinay domestic helper nga ginbayaan
sang iya employers kag gin-abisuhan sang embahada nga kun makapangita sang tiempo, magpadulong na lang sa Philippine embassy.
Si Calambro ang tumandok sang Alimodian kag nagatrabaho sa Syria bilang isa ka caregiver sa sulod na sang malapit 15 ka tuig.
