ILOILO CITY – Nagabululigay ang pila ka mga Filipino sa Estados Unidos agud mapadali ang pag-reunite ni Miss Universe Philippines 2020 Rabiya Mateo sa iya nga amay.
Sa interview sang Bombo Radyo kay Faci de Asis, tumandok sang Batad, Iloilo nga masobra 20 ka tuig na nga nagatrabaho sa Estados Unidos, iya ginpahayag nga natandog ang iya nga balatyagon sa istorya sang kabuhi sang Ilongga beauty queen rason nga nag-initiate siya sa pagpangita sa Indian-American nga amay ni Rabiya.
Ang amay sang 23-anyos nga biracial beauty queen amo si Zayed Mohammed Abdul Mufat kag ginapahayag nga isa ka doktor nga nakabase na subong sa Chigaco, Illinois.
Una diri, nangin bukas si Rabiya sa publiko sa istorya sa iya amay kun sa diin iya ginpahayag nga ini ang isa sa mga rason sang iya pagpasakop sa Miss Universe Philippines pageant.
Suno kay Rabiya, isa siya ka daddy’s girl apang bata pa siya sang ginbiyaan sila sang iya amay kag umpisa sadto, wala na ini nakabalik sa ila sa Pilipinas.
Ginpahayag ni Rabiya nga na-inspire siya sa istorya sang iya predecessor nga si Gazini Ganados nga natigayon nga nakita ang iya amay samtang nagapasakop sa Miss Universe pageant.
Suno naman kay De Asis, may mga gin-tap siya nga mga abyan kag kakilala sa Chicago, Illinois nga mahimo makabulig sa pagpangita sa amay ni Rabiya.
Yari ang Facebook post sang Ilongga nga si Faci de Asis: “Please let’s help our Miss Universe Philippines, Rabiya Mateo, to find her Dad, “ ZAYED MOHAMMED ABDUL MUFAT”, a US citizen but Indian by race who left them when she was about 5 years old. Her Dad moved to the USA after graduating the Medical School, the last time she heard about him is in Chicago a practing Dr.. I tried googling but what I found is a nephrologist in Chicago, Dr Abdul Mohammed.
I’m attaching a photo of her and her Dad.”
Lakip sa naka-post sa Facebook ni De Asis amo ang laragway ni Rabiya kag sang iya nga amay. ###
