Nakaboto na ang kapin 1.8 million ka mga registered voters sa Ohio may kaangtanan sa nagahilapit nga Election Day sa Estados Unidos sa Nobyembre 5.
Suno kay Bombo Mary Drake, international correspondent sa Ohio, bangud ginapahanugutan ang early voting sa mga ordinaryo nga mga residente, ang nasambit nga numero ang halos one-third sang kabilugan nga Ohio ballots nga ginalauman sa eleksyon.
Ginpahayag ni Drake nga mismo ang mga leaders sang Democratic kag Republican Parties ang nagaengganyo sang early voting bangud mas bentaha ini sa mga partido agud nga masiguro na ang voter turn-out.
Ginapanan-aw naman nga magdaug ang Republican nga si former president Donald Trump batok kay Vice President Kamala Harris bangud isa ini ka republican state sa sulod na sang pila ka tuig apisar nga nangin swing state ini sadto.
Ang mga botante sa Ohio ang maga- elect sang isa ka member sang US Senate agud magtiglawas sang estado sa November 5, 2024.
Maga-elect man ini sang 15 US representatives halin sa amo nga state.
Sa 2020 presidential elections, nagdaug si Republican Donald Trump sang 53.3 per cent sang boto batok kay Democrat Joe Biden.
