ILOILO CITY – Ginalauman nga matapos na subong nga tuig ang renovation sang tanan nga district plaza sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga magluwas sang padayon nga renovation sa La Paz, Molo kag Jaro, nagapadayon man ang renovation sa Mandurriao kag Arevalo.
Ang Plaza Libertad ang una na nga natapos.
Sang nagligad nga bulan, ang Molo Plaza ang gin-inagurahan na.
Suno kay Treñas, kun indi gid man matapos subong nga tuig, tinguhaan nga matapos na sa una nga bahin sang masunod nga tuig.
Agud nga malikawan ang vandalism sa mga plaza, ginpahayag ni Treñas nga may nagabantay na nga green guards diri.
Magluwas sina, may yara pa sang masobra sa 300 ka mga CCTV cameras nga ginbakal sa syudad agud nga ipang-install sa mga plaza, dalanon kag sa pila pa ka strategic areas nga gin-identify sang kapulisan kag Public Safety and Transportation Management Office (PSTMO).
