ILOILO– Nakahingagaw-pasa sang counter affidavits ang mga team leaders sang Criminal Investigation and Detection Group nga amo ang respondents sa pre-charge investigation bangud sang kontrobersyal nga police operation sa Tapaz, Capiz kag Calinog, Iloilo sang nagligad nga Disyembre 30, 2020.
Kahapon, Pebrero 19, ang ginhatag nga deadline sa mga respondents nga taga-CIDG Regional Field Unit Calabarzon kag National Capital Region.
Sa interview sang Bombo Radyo kay Pol. Col. Roger James Brillantes, director sang Regional Internal Affairs Service (RIAS) 6, iya ginpahayag nga nabaton na sang ila talatapan ang individual counter affidavits sang mga police respondents nga sanday:
Sa Calabarzon:
-Pol. Lt. Col. Joseph Nandu Jr.
-Pol. Maj. Charlie Mang-osa
-Pol. Maj. Warren Dilem
-Pol. Lt. Melchor Muñoz
-Pol. Lt. Emmanuel Rabe
-Pol. Lt. Elbert Santos
Sa NCR:
-Pol. Lt. Col. Reyson Bagain
-Pol. Maj. Dave Anthony Capurcos
-Pol. Capt. Michael Nathaniel Visco
-PEMS Juan Fernando
-PSSg Ferdinand Danao
-PSSg Glicerio Encela
Tanan ang lunsay nagapanindugan nga wala sang grave misconduct kag wala sang iregularidad sa ginhimo nga simultaneous operation nga nagresulta sa 9 ka mga patay sa Tapaz, Capiz nga gin-alegar mga miyembro sang rebelde nga grupo.
Gindistribute na ang mga counter-affidavits sa mga imbestigador.
May 10 ka adlaw ang RIAS 6 nga mapatigayon ang evaluation sang mga depensa kag rason sang mga police respondents.
Kun makitaan sang probable cause, ipatigayon ang summary hearing procedure kun sa diin kinahanglan ang personal appearance sang mga gina-imbestigaran nga mga pulis.
Nagpasalig ang natungdan nga mangin bukas sila sa publiko sa dalagan kag resulta sang imbestigasyon.
