ILOILO CITY – Bukas ang tanan nga police stations sa Western Visayas nga magbaton sa mga preso nga magasungka kasunod sang mandu ni Presidente Rodrigo Duterte may kaangtanan sa Good Conduct Time Allowance.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga magasunod sila sa mandu ni Presidente Duterte.
Suno kay Malong, indi pa maathag kun ano ang mangin epekto sang pronoucement sang presidente rason nga ila na lang nga hulaton ang written guidelines halin sa Philippine National Police Headquarters.
Samtang wala pa sang written guidelines, ginpahayag ni Malong nga magapakig-angot ang Police Regional Office 6 sa Bureau of Corrections agud nga makakuha sang kumpleto nga listahan sang mga preso nga nakabenepisyo sang Good Conduct Time Allowance.
Bangud sa P1 million nga bounty, ginpahayag sang natungdan nga may yara ini sang positibo kag negatibo nga epekto.
Ang positibo nga epekto sang P1 million nga bounty amo nga mapadasig ang pagdakop sa mga preso apang ang negatibo naman nga epekto amo nga mahimo nga hingalitan sang iban ang nasambit nga padya.
