ILOILO CITY – Magapakigbuylog man ang mga preso sa Iloilo Provincial Integrated Jail (IPIJ) sa Nanga, Pototan, Iloilo sa pag-obserbar sang kasakit ni Ginoong Hesukristo sa Biyernes Santo.
Sa interview sang Bombo Radyo kay Jail Warden Senior Inspector Abner Zamora, ginpahayag sini nga may reenactment man sang Sinakulo ukon kasakit ni Ginoong Hesus sa maabot nga Biyernes sa diin ang tanan nga mga cast kag stage crew ang lunsay mga detainees sang IPIJ.
Bukas naman ang amo nga kahiwatan sa publiko apang ginpahanumdom sang jail warden nga magsunod sa gihapon sa nagakaigo nga proseso sa pagsulod sang mga bisita sa IPIJ.
Ini na suno kay Zamora ang ika-apat nga tuig nga pagpatigayon sang kahiwatan bilang pagpakigbahin sang mga preso sa Semana Santa.