ILOILO CITY – Nagapatigayon sang mga aktibidad ang Barangay Council sang Calumpang, Molo, Iloilo City agud nga mapahagan-hagan ang basura sa ila lugar.
Sa interview sang Bombo Radyo kay Barangay Kagawad Analito Galban sang nasambit nga lugar, iya ginpahayag nga ila ginatutukan sa subong ang tuhoy sa solid waste management sa diin may yara sila sang exhibit sang mga butang nga himo sa recycled materials.
Halimbawa sa mga gina-exhibit sa ila barangay hall suno kay Galban amo ang gown kag souvenir nga himo sa plastic bottle, garbage bag kag plastic straw.
Magluwas diri, ginabayluhan man nila sang goods ang mga recycled material nga matipon sang mga pumuluyo.
Ginpahayag ni Galban nga may yara man sang “Munting Lin-ay ng Calumpang” nga patigayunon sa diin indi kwarta ang basehan sa
pagtumod sang magadaug apang sa baylo, ang may pinakamadamu nga basura nga natipon amo ang magadaug.
Mismo ang mga tiglawas sang Solid Waste Management Board sa syudad sang Iloilo ang magakilo sang basura kag nakadepende naman sa kabug-aton sang basura ang igahatag nga kwarta.
Magluwas sa “Munting Lin-ay ng Calumpang”, may yara man sang patigayunon nga mga pageant sa diin ang mga magapakigbahin ang magagamit sang recycled gown kag casual wear.
