Liwat nga ginkilala ang Bombo Radyo Philippines bilang major winner sa 46th Catholic Mass Media Awards (CMMA) nga nakakuha sang pinakamataas nga kadungganan kag nomination sa nagkalain-lain nga mga kategorya.
Ang Bombo Network News amo ang nagdaog sang prestihiyoso nga award nga Best News Program, samtang ang Afternoon Starsweep naman sang Star FM Bacolod amo ang ginkilala nga Best Entertainment Program.
Nakuha man sang network ang special citations sa apat sini ka mga programa nga amo ang mga masunod:
- Best Business Program – Bombo Special Report sang Bombo Radyo Philippines
- Best News Commentary – Bombo Special Report sang Bombo Radyo Philippines
- Best News Feature – Bombohanay Bigtime sang Bombo Radyo Koronadal kag ang Good Morning Philippines sang Bombo Radyo Laoag
Gindemonstrar sang Bombo Radyo Philippines ang kapag-on sini sa industriya matapos nakuha ang finalist spots sa walo gid sa siyam ka mga kategorya sa CMMA subong nga tuig bangud sa mataas nga kalibre sang content.
Yari ang dugang nga finalists halin sa network:
- Best Counseling Program – Kahapon Lamang sang Bombo Radyo Dagupan
- Best Drama Program – Recuerdos Dela Vida sang Bombo Radyo Vigan kag ang The Messiah sang Star FM Cebu
- Best Educational Program – Bombo Special Report sang Bombo Radyo Philippines kag ang The Visita Iglesia sang Bombo Radyo Legazpi
- Best News Commentary – Bombohanay Bigtime sang Bombo Radyo Baguio
- Best News Feature – Bombohanay Bigtime sang Bombo Radyo Koronadal kag Good Morning Philippines sang Bombo Radyo Laoag
- Best News Program – Bombo News and Views Morning Edition sang Bombo Radyo Cebu
Sa pagkamatuod, subong nga tuig, interesante nga internal competition ang nasaksihan sa mga programa sang Bombo Radyo sa mga kategorya nga Best News Program, Best News Feature, Best News Commentary, Best Education Program, kag Best Drama nga pagpakita lamang sang consistent nga dekalidad nga mga content sa nagkalain-lain nga estasyon sang network.
Ang CMMA nga isa ka award-giving body nga nagakilala sang media nga nagtib-ong sang Kristyano nga mga buluhaton ang nagkilala sa dedikasyon sang Bombo Radyo Philippines sa engaging, informative, kag value-driven broadcasting nga isa ka standard nga kilala sang mga Pilipino sa diin man nga bahin sang kalibutan.#
