ILOILO CITY – Tubtob na gid lamang sa mga terminal ang tanan nga provincial jeepneys sa maabot nga Hunyo 12 bangud ipatuman na sang syudad sang Iloilo ang Local Public Transport Route Plan (LPTRP).
Sa interview sang Bombo Radyo kay Iloilo Provincial Board Member Ramon Sullano, chairman sang Committee on Transportation sa Sangguniang Panlalawigan, iya ginpahayag nga una na nga ginkakibot nila nga napasar na ang ordinansa nga naga-adoptar sang LPTRP sang syudad.
Sang Marso 10, nagpatigayon sang pagsinapol ang komitiba ni Sullano upod ang planning office sang syudad kag probinsya kag Land Transportation and Franchising Regulatory Board (LTFRB).
Sa nasambit nga meeting, ginpasalig sang syudad nga amat-amaton lang ang pag-implementar sang LPTRP nga ginakatingalahan ni Sullano nga gulpihada ang implementasyon.
Ginhalimbawa ni Sullano ang natabo sang pag-implementar sang syudad sang parameter boundary ordinance kun sa diin, madamo sang na-late kag na-stranded sa mga terminal bangud sa kakulang sang salakyan.
Nagpanawagan naman si Sullano sa syudad sang Iloilo nga kun mahimo pasiguraduhon nga indi na masulit ang kaangay nga hitabo sa implementasyon sang parameter boundary ordinance.
Tinguha-an ni Sullano nga magpakig-angot sa opisina sang provincial planning officer may kaangtanan sa pagpanghanda sang provincial government sa posible huol nga madala sang implementasyon sang LPTRP.
