ILOILO CITY--Wala sang may na aprubahan sa tanan nga mga proyekto nga ginpresentar sa session sang Sangguniang Panlalawigan .
Ini matapos ang ginpatigayun nga deliberation kag pagplastar sang mga urgent measures gikan sa opisina sang gobernador sang Probinsya sang iloilo.
Sa ginpatigayon nga pagbinotohay sa sesyon pito sa onse ka mga Board Members ang nagboto pabor nga i-refer sa Commitee on Infrastructures ang tanan nga construction projects sa nagkalain-lain nga lugar sa Probinsya sang Iloilo.
Samtang iban pa nga mga proyekto ang gin-refer man sa nagakadapat nga komitiba.
Suno kay 3rd District Board Member Lorenz Defensor, wala man siya sang may nakita nga rason kun ngaai-delay ang execution sang proyekto.
Pahayag ni Defensor may yara man sang resource person gikan sa executive department nga makapaathag sa kun ano ka ginakinahanglan ang proyekto.
Apang wala ini na-aprobahan sa ginpatigayun sang pagbinotohay.
Samtang matapos sang pagbinotohay kun sa diin majority ang nagboto pabor sa pagrefer sang mosyon sa Commitee on Infrastructures, ang nasambit nga desisyon ang gin-aprubahan ni Board Member Domingo Oso nga nagserbe bilang presiding officer sang sesyon.
Nahibaluan nga wala sang sesyon sa masunod nga semana ang Sangguniang Panlalawigan bangud Semana Santa kag magaresume naman ini sa maabot nga Abril 23.
