Nag-umpisa na ang pagpanagtag sang fuel subsidy sa mga jeepney drivers nga apektado sang asud-asud nga pagsaka sang presyo sang gatong, apang nagasala sa gihapon ang pila ka transport group kun ano ang husto nga pagsulundan sang Land Transportation Franchising and Regulatory Board (LTFRB).
Ang Iloilo City Loop Alliance of Jeepney Owners and Drivers Association (ICLAJODA), halimbawa, ang nagatinguha pa nga makigsapol kay LTFRB Region VI Director Richard Osmeña.
Ini bangud suno kay ICLAJODA President Raymundo ‘Boyet’ Parcon, may mga operators nga mato-mato nga nag-witdraw sang kuwarta gamit ang ila nga Pantawid Pasada Program cards.
Sandig sa una nga anunsyo, one-time subsidy nga ₱7,200 per unit ang ihatag, apang may naga-reklamo nga mga driver suno kay Parcon nga kulang na ang nabaton nga kuwarta ukon tunga na lang sa balor sang ayuda.
Gina-kwestyon man sang ICLAJODA president kun ma-diretso gid man sa operator ang kuwarta ukon sa gasolinahan nga amo ang participating fuel outlets ukon eksklusibo nga mabaklan sang mga benepisyaryo sang gatong.
Una na nga gin-athag sang LTFRB Central Office nga ang fuel subsidy nga may kabug-usan nga balor nga ₱1 billion ang eksklusibo lamang para sa 136,000 jeepney franchise holders sa bug-os nga Pilipinas.
Ang tanan nga may existing Pantawid Pasada Program cards ang mahimo na maka-check sang ila account balance sa Landbank ATMs agud mahibaluan kun credited na ang ayuda.
Gina-abisuhan naman ang mga driver nga wala pa sang fuel card nga mag-coordinate sa ila respective LTFRB regional offices para sa schedule sang printing sang ila cards. ##
