ILOILO CITY – Ginahulat pa sang Police Regional Office (PRO)-6 ang mandu gikan sa PNP national headquarters kun ano ang matabo sang mga opisyal sang kapulisan sa Negros Island Region sa ti-on nga ibalik ang mga ini sa Western Visayas.
Kasunod ini sang pagpirma ni Presidente Rodrigo Duterte sang Executive Order No. 38 nga nagabungkag sa Negros Island Region.
Sa interview sang Bombo Radyo Iloilo kay PRO-6 spokesman Supt. Gilbert Gorero, ginpahayag sini nga bukas ang Camp Martin Delgado sa pagbaton liwat sa nasambit nga mga pulis nga sadto anay assigned man sa Western Visayas.
Suno kay Gorero, dako ang posibilidad nga ibalik sa PRO-6 ang mga PNP official nagikan sa NIR bangud sa Western Visayas man ang mga ini naghalin.
Sa karon suno kay Gorero, floating status pa ang mga miyembro sang PRO-NIR kag nagadepende pa kay Presidente Duterte kag PNP chief Ronald dela Rosa ang mangin kapalaran sang mga miyembro sang ila directorial staff kun sa diin ang mga ini ma-deploy.