Istrikto nga magabantay ang kapulisan sa screening area sa mga patyo sa syudad sang Iloilo agud malikawan nga may magpasulod sang delikado nga mga hinganiban kaangay sang armas kag patalom.
Lakip man sa dumilian nga dal-on amo ang makahulubog nga ilimnon.
Ginapahanumdom man sang kapulisan nga ginadumilian nga magsugal kag magpatukar sang matunog nga musika kadungan sang pagbisita sa mga minatay.
Sa bahin sang Tanza Cemetery nga isa sa pinakadaku nga patyo sa syudad, ginpahayag ni Police Captain Michael Tuburan, officer in charge sang Iloilo City Police Station 7, nga preparado na ang ila contingency measures para sa pagdamo sang mga tawo buwas, Nobyembre 1 tubtub sa Domingo, Nobyembre 2.
Isa lang ang alagyan pasulod kag isa man pagguwa sa patyo. Pahayag sang pulis, umpisa buwas, dumilian man nga makasulod ang mga salakyan sa entrada sang Tanza Cemetery.
Ginapahanumdom sang pulis sa mga may edad na ukon may ginabatyag sa lawas nga magdala gid sang kaupod kun magkadto sa patyo agud nga may magbulig gilayon sa ila pananglitan maglain ang pamatyag.
Ginapanugyan man nga magdala sang tubig ilabi na bangud sa mainit nga tyempo.
Nahibaluan nga halos 4,000 ka mga uniformed personnel ang ipalapta sa bug-os nga Western Visayas kadungan sang Undas lakip na ang masobra 2,000 nga halin sa Philippine National Police (PNP).#
