Masami nga nagakaganyat ang mga pulis, militar kag manunudlo sa ginatawag nga scam.
Sa interview sang Bombo Radyo Atty. Joenar Pueblo, iya ginpahayag nga kun madasig, mahapos, kag ‘too good to be true’, ini ang makabig nga pagpangganyat ukon scam.
Suno kay Pueblo, ang scam amo ang pagganyat sa mga tawo nga mag-invest sang kwarta sa diin nagatanyag sang double your money scheme nga nagadangat sa 100 percent money back.
Ini man ang ginatawag nga ‘ponzi scheme’ nga naghalin sa Italy kag ginakabig nga pyramiding scam sa diin sa sulod sang investment, may yara sang uplines kag downlines.
Pahayag ni Pueblo, ini nga scheme ang nagapapati sa mga biktima nga ang ila kwarta ang naghalin sa sales sang mga produkto sang isa ka korporasyon apang sa pagkamatuod, ini ang naghalin sa iban nga investor.
Gin-athag ni Pueblo nga sa pyramiding scheme, mahimo nga makabaton sang kwarta ang yara sa ibabaw ukon uplines, apang ang sa idalom ukon ang downlines ang maka-agum sang pasalig bangud sa madugay nga rollback sang kwarta.
Kun wala pa nagdangat sa milyon ang kwarta nga na-invest, mahimo nga makapasaka ang isa ka tawo nga nascam sang small claims sa diin indi na kinahanglan nga magkuha sang abogado.
Mahimo na man nga pasakaan sang kaso nga syndicated estafa nga wala sang katumbas nga piyansa ang isa ka grupo ukon korporasyon nga nagapangscam.
Kun may nagapa-into kag nagapang-into, mabudlay suno kay Atty. Pueblo mapauntat ang isa ka scam.
Hugot man nga nagpanugyan ang abogado sa publiko nga likawan ang pag-intra sa mga investment scam.
