ILOILO – Ipaidalum na sa Reverse Transcription Polymerase Chain Reaction (RT-PCR) ang tanan nga mga preso kag pulis nga naka-duty sa San Joaquin Municipal Police Station.
Ini ang kasunod sang pagpositibo sa COVID-19 sang apat ka mga preso kag isa ka pulis.
Sa interview sang Bombo Radyo kay Iloilo Police Provincial Office (IPPO) Dir. Pol. Col. Gilbert Gorero, iya ginpahayag nga may gin-aresto ang mga pulis kag nahibaluan nga positibo sa COVID-19 ang amay sang ila na-aresto.
Ginpaidalom sa RT-PCR test ang arestado kag nagpositibo man sa COVID-19.
Apisar sini, nagapasalamat si Gorero sa San Joaquin Municipal Police Station nga wala nagpagduha-duha sa pag-obra sang ila katungdanan sa pihak sang pagpanghangkat sang COVID-19 pandemic.
Ginpahayag ni Gorero nga gilayon sila nga nagresponde agud nga indi na madugangan pa ang numero sang pulis kag preso nga matapikan sang virus.
May gin-augment na nga mga pulis ang IPPO sa San Joaquin Municipal Police Station samtang wala pa nakaguwa ang resulta sang mga pulis nga ginaidalom sa swab test.
