ILOILO CITY – Makabaton sang hazard pay ang tanan nga pulis nga nagaduty may kaangtanan sa ginapatuman nga Enhanced Community Quarantine.
Sa interview sang Bombo Radyo kay Police Regional Office 6 Director Police Brigadier General Rene Pamuspusan, iya ginpahayag nga P500 per day ang hazard pay sang tagsa ka pulis.
Suno kay Pamuspusan, may yara na sang guidelines ang Philippine National Police tuhoy sa pagpanghatag sang hazard pay.
Ginpahayag ni Pamuspusan nga ang mga pulis ilabi na ang nagabantay sa border checkpoints ang makabig man nga frontliner kasubong sa mga medical personnel nga nagataya sang ila kabuhi.
Gin-athag naman ni Pamuspusan nga boluntaryo naman ang paghatag sang bulig para sa Bayanihan Fund Challenge sang Philippine National Police.
Suno sa Regional Director, wala sang pilitay nga matabo kag sa baylo, bisan pila nga kantidad ang mahimo nga idonar para sa nasambit nga programa.
Ang matipon nga pondo paagi sa Bayanihan Fund Challenge ang igahatag para sa Social Amelioration Program kag iban pa nga programa sang gobyerno.
