Nagapadayon ang manhunt operation sang kapulisan sa mga miyembro sang rebelde nga grupo nga amo ang ginapatihan nagpalupok sang hanging improvised explosive device (IED) sa Sitio Kipot, Barangay Balicua, Tubungan, Iloilo.
Matandaan nga bangud sa insidente nga sang Hwebes sang hapon, Disyembre 17, nag-crack ang windshield sang bag-o nga patrol vehicle sang Tubungan Municipal Police Station kag nakaangkon sang minor injury sa butkon ang hepe nga si Pol. Lt. Jose Rommel Samson.
Base sa impormasyon nga ginpalab-ot sang isa sa mga pumuluyo sa lugar, sang aga sang amo nga adlaw, may yara na sang duha ka persona, ginabanta nga nagaedad 20 anyos pataas, nga nasiplatan nga nagatinir sa Sitio Kipot.
Sang napalupok na ang hanging improvised explosive device, wala naman nakit-an pa ang duha ka persona.
Sila ang ginapatihan nga miyembro sang Communist Party of the Philippines -New People’s Army.
Sa interview sang Bombo Radyo kay Police Lt. Col. Joem Malong, spokesperson sang Police Regional Office VI, iya ginpahayag nga padayon pa nga ginatumod sang mga pulis ang identity sang duha ka persona agud mapasaka ang nagakaigu nga kaso.
Ginpahayag man sang natungdan nga may yara sang checkpoints sa mga exit points sa nasambit nga lugar.
Isa ka sahi sang kalakasan kag pagtraidor ang ginhimo sang mga New People’s Army suno kay Malong kag ini ang ginakondenar gid sang Police Regional Office VI.
Bangud nga wala sang holiday ceasefire kag bangud sa palaabuton nga ika-52 nga founding anniversary sang Communist Party of the Philippines sa Disyembre 26, doble ang pagdepensa sang mga pulis.
Suno kay Malong, intensified na ang pagpanghanda sa mga police stations kag may yara man sang high-powered firearms nga ginhatag sa mga pulis sa lugar nga yara sa high-risk areas.
Ginapanan-aw man nga may yara sang dugang nga pagpangharass ukon pagpang-atake nga himuon ang mga rebelde nga posible makatuga sang halit — ukon kun indi man — posible nga makakuha sang atensyon sang publiko kag sang media.
