Ginpangbuyagyag na sang whistleblower nga si Julie “Dondon” Patidongan ang pangalan sang mga pulis nga gin-alegar may kahilabtanan sa pag-kidnap kag pagpatay sa mga missing nga mga manugbulang sang 2021.
Natabo ang pagbulgar sang mga pangalan ang nagpasaka si Patidongan kaupod ang pamilya sang missing sabungeros sang administrative complaint sa National Police Commission (Napolcom) batok sa masunod nga mga pulis:
Police Colonel Jacinto Malinao Jr. (Visayas)
Police Lieutenant Colonel Ryan Jay Orapa (Highway Patrol Group or HPG)
Police Major Mark Philip Almedilla (Cavite HPG)
Police Executive Master Sergeant Aaron Ezrah Cabillan (HPG)
Police Chief Master Sergeant Arturo dela Cruz Jr. (Cavite HPG)
Police Staff Master Sergeant (PSMS) Joey Encarnacion (Cavite HPG)
PSMS Mark Anthony Manrique (HPG)
PSMS Anderson Abale (Cavite HPG)
Police Staff Sergeant Alfredo Andres (Cavite HPG, due for retirement)
Police Corporal Angel Joseph Martin (Cavite HPG)
Sa iya affidavit, ginpahayag ni Patidongan nga ginpangbayaran ang mga pulis agud nga patyon ang mga manugbulang kag itagbong ang mga bangkay nila sa Taal Lake.
Bangud administrative complaint ini, mahimo nga ang penalidad amo lamang ang suspension ukon pagkakas sa ila sa serbisyo depende sa desisyon sang Napolcom.
Gin-tag man ni Patidongan ang isa ka retired police major general nga si Jonnel Estomo nga amo ang former Southern Luzon commander sang Philippine National Police (PNP).
Ginpahayag sini nga ini nga anay general ang isa ka “alpha member” sang cockfighting industry, buot silingon, suod kay Atong Ang nga amo ang ginatudlo sang whistleblower nga amo ang mastermind sa krimen.
