May mga laragway nga ginauyatan ang National Police Commission (NAPOLCOM) Region VI nga nagapakita sang ginaalegar kaangtanan sang mga pulis sa kwestyonable nga investment scheme sa Roxas City, Capiz.
Sa interview sang Bombo Radyo kay NAPOLCOM Region VI director Atty. Joseph Celis, iya ginpahayag nga base sa iya nabaton nga impormasyon kag nga ebidensya, may mga police personnel nga “nagapinadayaw pa” kag nagapost sang ila nabaton nga kwarta apisar suksok ang uniporme.
“I have a public duty and obligation to bring this up because this affects the police service kay may mga pulis nga involved,” pahayag ni Celis.
May mga uplines pa suno kay Celis. Ini ang partikular nga nagatumod sa kontrobersyal nga Chiyuto Creative Wealth Document Facilitation Services nga kilala man bilang Chiyuto Double Your Money Scheme.
“They are schooled, they are trained, and they are being paid by the government because they are presumed to be qualified. Pagwaon nila ang istorya nga nabiktima sila? How stupid they can get nga makahambal sila sang amo sina,” pahayag ni Celis sa mga pulis nga nagapahayag ‘biktima man sila’. Dugang pa niya, “It boils down sa value of their family..nga sila… ining mga pulis ni mga matamad, mga sungak-sungak, kag wala gid makaagi bugana sa pangabuhi nga daw namag-o sa kwarta… kag ginapost pa sa Facebook ang paldo-paldo nga kwarta, gasaot-saot pa kag nakauniporme.”
Suno kay Celis, ‘indi siya makahambal sang patapos’ apang ini ang maathag nga paglapas sa ethics sang isa ka pulis nga yara sa serbisyo.
“Mga sungak-sungak sila kag dalok-dalok sa kwarta. Siguro wala gid katilaw sang damo nga kwarta halin sang una ang nagpululis nga ini. Ang iban siguro opisyal pa na da… te karon, whether nga manabat sila sa layi ukon indi, mabwelta man ni sa ila, sa lawas nila, ukon sa kabataan nila, kay you know ang naapektuhan mo di is pangabuhi sang iban.”
Liwat man nga ginpaathag sang natungdan kun ngaa imposible para sa isa ka negosyo ang pagpadoble sang kwarta sang tawo sa sulod sang malip-ot nga tion.
“Logically it is impossible for an entity doing business to give you double, tripe, quadruple income [return sa gin-invest mo] in just a short period of time. Diin nila na kwaon? Kundi sa mga biktima nila sa dalom. Indi kita mango nga indi kita sina makaintindi ah. Galing kay nabulag sa kwarta.”
Para sa mga pulis nga indi man mapahayag ni Celis kun ‘under investigation’ ukon indi, mensahe sang police official:
“We will see kun diin asta ang lupok sini. Indi ko ya maghambal patapos, pero basta may salabton sila sa tawo.”
Yara naman sa National Bureau of Investigation suno kay Celis ang bug-at sa pag-imbestigar sa mga uplines nga nag-surface sa Facebook page sang tag-iya sang investment scheme.
Ang Chiyuto Double Your Money Scheme ang una na ginpahayag sang NBI Region VI nga isa ka pyramiding scam ukon investment scam kag ginpahayag sang SEC Region VI nga wala sang secondary license kag santo sa advisory sang Enforcement and Investor Protection Department sang SEC, wala narehistro sa komisyon — “either as a corporation or as a partnership.”
