Nagapadayon sa gihapon ang trabaho sang iban nga mga pulis nga involved sa drug buy bust operation sa Barangay North Baluarte, Molo, Iloilo City sang Hunyo 29 sa diin naluthangan-patay si Karl Dannielle Bolante, 27anyos.
Sa interview sang Bombo Radyo kay PCol. Roger James Brillantes, Chief sang Regional Internal Affairs Service (RIAS) 6, iya ginpahayag nga on-duty sa gihapon sa Iloilo City Police Office (ICPO) ang iban nga mga pulis nga naangot sa kontrobersyal nga operasyon.
Suno kay Brillantes, wala pa napaguwa sang RIAS 6 kun pila gid ang involve sa insidente.
Kun mahibaluan nga may yara pa sang dugang nga pulis nga may principal involvement sa buy bust operation, sila ang ipatawag sang talatapan para sa separado nga imbestigasyon.
Apang sa subong, sanday Police Corporal Rodante Lopez, operatiba sang Iloilo City Police Station 1 – Station Drug Enforcement Team, kag Police Captain Shella Mae Sangrines, hepe sang Police Station 1 pa lang ang napasakaan sang kaso.
