ILOILO CITY – Lunsay temporaryo nga ginrelieve sa pwesto ang mga pulis nga nakit-an sa video nga may tig-ulo ‘Iloilo City Riding in Tandem Killings’.
Ang amo nga video ang gin-upload sa YouTube sang Marso 2 sa diin ginatudlo ang mga pulis nga nagpamangamot sa extra judicial killings sa Iloilo City.
Sa interview sang Bombo Radyo kay PLt. Col. Joem Malong, spokesperson sang Police Regional Office (PRO) 6, iya ginpahayag nga agud mangin tayuyon ang imbestigasyon nila may kaangtanan sa ginapahayag ‘malisyoso’ nga video, nagmando ang Chief Regional Staff nga i-relieve anay ang nasambit nga pito ka mga pulis.
Suno kay Malong, nag-ako ang mga pulis nga tuman sila ka apektado lakip na ang ila pamilya kasunod sang kontrobersiya.
Bangud diri suno kay Malong, desidido man nga magapasaka sang formal complaint ang pito ka pulis.
Ang formal complaint suno sa natungdan, ang ipasa man nila sa YouTube agud makakas sa social media platforms kag maimbestigaran kun sin-o ang nag-upload sang video.
Sa subong yara na sa Regional Police Holding and Accounting Unit ang pito nga mga pulis nga ginalakipan sang anom ka lalaki kag isa ka babaye.
