Ginbalabagan ang mga pulis nga nagtuyo nga mag-raid sa mga opisina ni South Korean President Yoon Suk Yeol.
Ini nga raid ang ginpatigayon agud imbestigaran ang iya gulpyada nga deklarasyon sang martial law nga gilayon man ginbawi bangud sa pag-alsa sang opposition kag sang publiko.
Antes sini, gindumilian na si Yoon sa pagbyahe sa iban nga pungsod bilang kabahin sang “insurrection” probe sa iya inner circle bangud sa drama nga natabo sang December 3-4 nga nagkibot indi lamang sa Seoul kundi pati sa ila nga mga kaalyado.
Suno sa South Korean police, pila ka oras nga ginbalabagan sang presidential staff and security ang special investigation team.
Sunod man nga nagpaandam ang main opposition nga Democratic Party nga maga-file sila sang kaso nga insurrection batok sa presidential staff and security kun padayon nila nga punggan ang law enforcement.
Sa pihak nga bahin, gin-report naman sang mga otoridad sa presuhan nga nagtuyo nga maghikog si former defense minister Kim Yong-hyun matapos nga gindakop ini sang nagligad nga gab-i.
Si Kim ang gina-akusaran nga nagsuhestyon kay Yoon nga magpatuman sang martial law.
Una siya nga gin-detain sang Domingo kag pormal nga gin-aresto sang Martes sang gab-i bangud sa pagpahilabot sa critical duties sa tion sang insurrection” kag gin-alegar nga nagkomiter man sang “abuse of authority to obstruct the exercise of rights”.
Sini lang nga Mierkules, gin-report naman sang justice ministry nga yara na ini sa maayo nga kondisyon.
