Ginmanduan sang Police Regional Office (PRO) VI ang Iloilo City Police Office (ICPO) nga mag-request sang dugang nga pwersa para maka-patrolya sa distrito sang Mandurriao.
Sa interview sang Bombo Radyo kay PRO VI Regional Director Police Brigadier General Josefino Ligan, iya ginpahayag nga kabahin ini sang ila na-istoryahan ni ICPO Director Police Colonel Kim Legada.
Gin-abisuhan sini ang director nga i-address ang request sa Regional Mobile Force Battalion (RMFB) agud nga madugangan ang mga personnel sa foot patrolling ukon ang mga personnel nga nagalakat-lakat kag nagalibot para nga ma-monitor kag ma-secure ang area.
Sa subong suno sa police official, nakit-an nga nagatutok ang mga pulis sa mobile patrol kag paglibot sakay sa motorsiklo.
Matandaan nga may rambol ang mga pamatan-on nga natabo sa Gaisano ICC grounds sini nga Agusto. Sini nga Septyembre, ginpyestahan man sa social media ang baisay sang duha ka magtimbang nga kampo nga natabo sa Cubix.
Ang pinakaulihi nga insidente amo ang pag-hold-up sa asawa ni Retired Police Colonel Cornelio Salinas sa parking area sang isa ka mall.
Nahibaluan nga ginakilala ang Mandurriao bilang central business district sa Iloilo City kun sa diin may mga BPO companies, retail centers, hotels, high-rise buildings, kag may mga balay-ilimnan.
