ILOILO – Wala makahibalo ang Janiuay Philippine National Police sa ginpatigayon nga online bulang sa Barranco Sports Complex sa Janiuay, Iloilo.
Nahibaluan naglapas sa guidelines sang Inter-Agency Task Force ang mga organizer sang bulang sa diin ginadumilian ang online betting kag livestreaming sang aktibidad.
Sa interview sang Bombo Radyo kay Police Captain Eleazar Climacosa, hepe sang Janiuay Municipal Police Station, iya ginpahayag nga nagpasa na sila sang pila ka mga rekomendasyon sa Iloilo Provincial Police Office.
Suno kay Climacosa, ang promoter kag management sang Sports complex ang nagakadapat magpaathag sa Inter-Agency Task Force may kaangtanan sa mga camera nga ginbutang samtang ginapatigayon ang pagbulang.
Ginpahayag sang hepe nga nagsalig sila nga may permit ang organizer sang bulang apang wala sila nakahibalo nga may violation tuhoy sa natabo nga livestreaming.
