Ginpasalig sang mga pulis sa Western Visayas ang pagpabilin sang kalinong kag katawhay kun mag-umpisa na ang ‘Oplan Baklas’ ukon pagkumpiska sang illegally posted campaign materials.
Sa interview sang Bombo Radyo kay Police Lt. Col. Arnel Solis, spokesperson sang Police Regional Office (PRO) VI, iya ginpahayag nga tutukan sang mga pulis ang peace and order sa tion nga maghatag na sang signal ang Commission on Elections (COMELEC) sa pag-umpisa sang ‘Oplan Baklas.’
Agud mapatuman ini suno kay Solis, indi sila mag-intra sa pagpangkakas sang campaign posters kag mga tarpaulin.
Nahibaluan nga sa Iloilo City, pagatapuan sang COMELEC , Philippine National Police, Department of Environment and Natural Resorces kag Iloilo City Engineeing District ang patigayunon nga ‘Oplan Baklas.’
Sa bahin naman sang Bureau of Fire Protection (BFP) Region VI, wala pa sila sang may nabaton nga instruction naggikan sang COMELEC natuhoy sa ila mangin papael sa ‘Oplan Baklas.’
Sa interview sang Bombo Radyo kay Fire Senior Superintendent Atty. Jerry Candido, director sang BFP Region 6, iya ginpahayag nga kada eleksyon, ang polling precincts ang masami nila nga ginabantayan kag clean-up drive pagkatapos sang pinili-ay.
Apang pag-abot sa pagbangbaklas sang campaign materials, indi sila makamato-mato kun wala sang mando halin sa COMELEC.
