Mga pulis sang Reg'l Drug Enforcement Unit nga yara sa listahan sang nadakpan nga drug pusher, gin-akusaran sang pangmolestiya

ILOILO CITY – Liwat nga nabutang sa kontrobersiya ang mga miyembro sang Regional Drug Enforcement Unit (RDEU) sang Police Regional Office 6 (PRO6) matapos nga gin-akusaran sang pagpangmolestiya.
Ginpahayag sa Bombo Radyo Iloilo ni Berly Barona nga ginpasakay siya sang mga pulis nga kabahin sang RDEU, sa patrol car sang mga ini agud magtestigo sa ila nga drug buy bust operation.
Sa alegasyon ni Barona, pilit siya nga ginhalukan sang apat ka beses ni PO1 Lyndon Gonzaga.
Magluwas sa pagkuha sang iya mga gamit, ginpahayag ni Barona nga ginbutangan ni PO1 Gonzaga sang 17 ka sachet sang iligal nga droga ang iya bag.
Suno naman sa isa pa ka tagreklamo nga si Joan Dumarang, gindakop siya sang miyembro sang RDEU apang sa baylo nga dal-on sa PRO6, gin-check-in siya sa hotel kun sa diin siya ginbastos kaangay sang paghurikap sa iya dughan.
Kalakip suno kay Dumarang sa mga pulis nga naghimo sini sa iya sanday PO1 Lyndon Gonzaga kag PO3 Christopher Leonor nga nalakip ang pangalan sa blue book sang drug pusher nga si Jackie Lou Espinosa kag tatlo ka iban pa nga nakilala lamang sa ngalan nga Muso, Soliman kag Villanueva.
Gilayon naman nga nagdepensa ang team leader sang RDEU sa alegasyon nga ginkaulamiran sang mga tinawo sini.
Suno kay S/Insp. Kenneth Bermejo, lunsay kabutigan ang ginapasibangud sa iya mga tinawo kag gusto lang nga gub-on ang ila hanay.