ILOILO CITY – Nagdugok ang mga pumuluyo sa mga plaza bangud sang mga matahum nga Christmas lights display sa syudad sang Iloilo.
Sa interview sang Bombo Radyo kay Engr. Noel Hechanova, pinuno sang Iloilo City Environment and Natural Resources Office, iya ginpahayag nga daw angay sang piyesta ang pagdugok sang mga pumuluyo sa kada plaza sang syudad sang Iloilo.
Suno kay Hechanova, wala sang kaso kun magkalipay kita kag sa liwat ma-eksperyensyahan ang ispirito sang Paskwa apang kinahanglan indi gid paglipatan ang ginapatigayon nga mga health protocols.
Pahayag sang natungdan, madamo sila na-obserbahan nga pumuluyo sa diin nagadinalagan kag hala ka papicture kag wala nagasunod sang social distancing kag pagsuksok sang mask.
Dugang pa sang pinuno nga magaplano sila kun paano ini masolusyunan agud indi na magtaas pa ang kaso sang COVID-19 sa syudad sang Iloilo.
