ILOILO CITY – Padayon pa nga nagalaom nga mahatagan sang AC Energy sang cash assitance ukon ayuda ang mga pumuluyo nga apektado sang oil spill sa Bo. Obrero, Lapuz, Iloilo City.
Sa exclusive interview sang Bombo Radyo kay Punong Barangay Ricardo Diño Jr., iya ginpahayag nga nagapabilin sa gihapon nga dako nga palamangkutanon sa mga pumuluyo sang nasambit nga lugar kun maabot pa ang ayuda nagikan sa AC Energy.
Suno kay Diño ang mga magabaton sang ayuda amo ang manugpangisda kag nagabaligya sang isda kag nagakadapat nga mapamatud-an nga registered ang mga ini sa Bureau of Fisheries and Aquatic Resources (BFAR).
Apang gin-athag man sang punong barangay nga ang tanan nga requirements nga ginhingyo sang AC Energy ang naprocess na nila kag napasa.
Nagpanawagan man si Diño sa pamunuan sang AC Energy nga tumanon ang ginpasalig nga cash assistance.
Matandaan nga Hulyo 3 sang naglupok ang power barge nga may unod nga 300,000 liters sang bunker fuel sa Bo. Obrero, Lapuz, Iloilo City.
Nagdangat naman sa 48,000 liters ang nagtaas nga bunker fuel sa diin indi lang ang mga baybayon sa Syudad sang Iloilo ang apektado kundi mangin ang Guimaras kag Iloilo Province.
