Iloilo City – Ginkasugtan sang Iloilo City Government kag mga pumuluyo nga apektado sa nagluntad nga sunog sa Barangay San Juan kag Barangay West Habog-Habog, Molo, Iloilo City nga tubtob sa Biyernes na lamang, Pebrero 10 ang pag-tinir sang mga ini sa mga evacuation centers.
Matandaan nga masobra 200 ka mga panimalay ang ginlamon sang kalayo sa nagluntad nga sunog sang Enero 28.
Sa interview sang Bombo Radyo kay Iloilo City Mayor Jerry Treñas, iya ginpahayag nga nahatag na sang syudad ang nagakaigo nga cash assistance.
Nagtanyag man sang dugang nga bulig ang Department of Social Welfare and Development nga nagabalor sang P447,860 nga ginabug-usan sang food kag non-food items.
Ginapahayag nga ang natipon nga cash assistance sang mga nasunugan nga nagdangat sang P25,000 ang gamiton sa pagtukod sang temporaryo nga balay.
Sa subong, nakatutok ang alkalde sa long-term solution para sa mga nasunugan kag isa na diri ang pagpatukod sang communal facilities.
Kun balik-balikan, 1.3 nga ektarya ang kalaparon sang duta nga ginbakal sang gobyerno nga mahimo maka-accomodate sang tanan nga nasunugan.
