ILOILO CITY – Ginapahanumdom sang Department of Interior and Local Government (DILG) sa mga local government unit ang hugot nga pagpatuman sang 14-day quarantine period.
Sa interview sang Bombo Radyo kay Engr. Ariel O. Iglesia, regional director sang DILG Region 6, iya ginpahayag nga nagakadapat nga nga sundon ang ginpagwa nga memorandum circular 2020-023 ukon ang Amended Guide to Action Against Coronavirus Disease 2019 (COVID-19).
Suno kay Iglesia, katuyuan sang nasambit nga memorandum nga magpaidalom sa voluntary quarantine ang mga pumuluyo nga naghalin sa mga pungsod nga apektado sang Coronavirus Disease 2019 ilabi na sa China.
Ginpahayag ni Iglesia nga sa tion nga magpaidalom sa quarantine ang isa ka pumuluyo nga naghalin sa mga pungsod nga apektado sang COVID-19, manubo ang risgo nga maglapta ang virus.
Kaupod man sang DILG sa pagpatuman sang nasambit nga pagsulundan ang Bureau of Quarantine kag Department of Health.
