Indi magnubo sa 100 ang mga pumuluyo nga indi updated ang travel pass nga naglabay sa Sta. Barbara, Iloilo border control point.
Madumduman nga Hunyo 4 nag-umpisa ang travel pass requirement sa Iloilo Province sang ginpatuman ang border restrictions.
Apang una na gin-athag ni Iloilo Governor Arthur Defensor Jr., nga tubtob Hunyo 18 na lamang ang validity sang travel pass nga gin-isyu sa mga residente sa diin kinahanglan nga ipa-extend ang effectivity ukon kinahanglan gid magkuha sang bag-o samtang napaidalom ang probinsya sa Modified Enhanced Community Quarantine ukon MECQ tubtob sa Hunyo 30.
Sa interview sang Bombo Radyo kay Police Staff Sgt. Bobbie Anam, Team Leader sang border control point sa Sta. Barbara, Iloilo, iya ginpahayag nga wala untat ang ila pagtsikyar sa mga pumuluyo nga nagalabay agud masigurado kun updated ang ila nga travel pass.
Suno kay Anam, nangin madamo ang numero sang mga tawo nga indi updated ang travel pass, apang sa baylo nga pabalikon pa ang mga ini sa ila nga mga lugar, gin-abisuhan nalang nila ang mga pumuluyo nga ipa-update gid ini.
Ang mga indi updated ang travel pass suno sa pulis ang ginpangitaan man nila sang dugang nga dokumento kaangay sang valid identification card (ID) ukon company ID.
Matandaan nga para sa mga residente sang Iloilo City, Antique, Guimaras, Aklan, Capiz, Bacolod City, kag Negros Occidental, indi na kinahanglan ang travel pass.
Sa idalom sang omnibus guidelines para sa interzonal travel, ang kinahanglan lang nga ipakita amo ang Identification Card ukon proof of business ukon mga dokumento agud nga mapamatud-an sa checkpoint kun ano ang padulungan sa probinsya sang Iloilo.
