ILOILO CITY- Nagapakitluoy ang mga pumuluyo sang Brgy. Camalig, Jaro, Iloilo City nga indi sila pagdalukan sang ila alagyan.
Ini kasunod sang plano sang developer sang Casa Mira Subdivision sa amo nga barangay nga siraduhan ang dalan sa sulod sang subdivision nga ginalaktudan sang mga residente.
Sa interview sang Bombo Radyo kay Elene Evera, residente sa lugar, iya ginpahayag nga kun ipasirado ang amo nga dalan, magaantos sila sa paglakat sang kapin duha ka kilometros agud makalab-ot sa main road.
Suno kay Evera, may yara sang ginhatag sa ila nga road right of way apang ang problema, nagalapad lang ini sang 1.5 metros kag footwalk lang ang mahimo agyan sang mga tawo.
Pahayag niya, indi man mahimo malabyan sang tricycle ang road right of way bangud tuman ini ka kitid.
Dugang niya, 3 meters ang kalaparon sang road right of way nga ginpromisa sa ila apang wala ini natuman kag ang problema pa gid amo nga wala man sila sang dokumento nga ginauyatan bangud verbal agreement lang ang natabo.
Nahibaluan nga apektado sa tikang sang amo nga subdivision ang kapin 700 ka pamilya sang Zone 5 kag 6 sang amo nga barangay.
Nagahingyo man sila kay Iloilo City Mayor Jerry Treñas nga hatagan sang igtalupangod ang ila reklamo.
