LOS ANGELES CALIFORNIA– Nagapasalamat ang mga pumuluyo sa Southern California nga wala sang may nagkalasamaran sa nagluntad nga magnitude 7.1 nga linog.
Sa interview sang Bombo Radyo kay Bombo International Correspondent Desiree Badana-Muñoz, direkta sa Los Angeles, iya ginpahayag nga nabatyagan man nila ang epekto sang 7.1 nga linog nga nag-igo sa Ridge Crest, California.
Suno Muñoz, nagamaneho siya sang salakyan sang natabo ang linog.
Kasubong suno sa iya nga ginaduyan siya kag iya pa nabati-an nga nagasinggitan ang mga tawo. Wala sang may nagkalasamaran ukon casualty sa lugar sa diin malapit ang sentro sang nasambit nga linog.
May yara naman sang halos 160 ka mga afterschocks apang sa ila bahin sa Los Angeles, tatlo ukon apat lang ka aftershocks ang ila nabatyagan.
Gintuad man niya nga sa tion nga may kalamidad, organisado ang mga tawo bangud ginapahanumdum sila sang gobyerno nga maghanda, magpamati sa mga radyo kag magtan-aw sang TV para sa mga developments sa tion nga may linog.
Padayun naman ang pagpahanumdum sang US Government sa mga pumuluyo nga mahimo may yara pa sang magluntad nga linog kasunod sang magnitude 7.1.
