Ginakabig nga sideline sang pila ka mga pumuluyo ang pagpaminta sa mga pantyon sa Tanza Public Cemetery sa tion sang pista minatay.
Sa interview sang Bombo Radyo kay Devon, naga-sideline paminta sa nasambit nga patyo kag residente sang Zone 2, Brgy. Tanza-Timawa, City Proper, iya ginpahayag nga isa gid siya ka pintor sang mga condominium kun sa diin kada hapon magtapos ang iya ubra nagaderikta ini sa patyo agud buligan ang iya amay nga magpinta sang mga pantyon bilang dugang man sa iya income.
Pahayag niya, 20 na ka tuig nila ginahimo sang iya amay ang pagpaminta sa mga patyo.
Suno sa iya, isa ka libo ang ila sukot sa kada pantyon apang nakadepende pa ini kun may yara pa gid sang dugang nga ipaubra ang ila customer.
Dugang niya nga indi man daku ang ila gid nga kita sa pagpaminta bangud nga tuman na gid ka mahal ang mga materyales kag indi man sila ka pataas pa gid sa presyo sa labor kay wala man sang mapahimu sa ila.
Sa separado naman nga interview kay Ian, isa man nga naga-sideline paminta sa nasambit nga patyo, iya ginpahayag nga lima na ka tuig niya ini ginahimu bilang dugang man sa iya nga kita.
Pahayag niya nga magtapos ang pista minatay, mabalik naman ini siya sa pagbaligya sang mga prutas sa City Proper.
Apang, ginpahayag sini nga sa subong magamay pa lang ang ila kita bangud nga wala pa gid sang madamo nga nagabisita sa patyo kag nagapaubra sa ila.
Dugang pa niya, may yara man sila sang mga suki nga nagabalik-balik sa ila kada tuig.
Ginalauman gid sang mga sepulturero kag pintor sa nasambit nga patyo nga magadamo pa ang ila kita subong nga tuig sang pista minatay.
Magluwas sa mga sepulturero kag pintor, may yara man sang mga kabataan sa patyo nga naga-sideline panglimpyo para sa ila pangkaon ukon dugang sa ila balon sa eskwelahan.
By: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
