ILOILO CITY – Nagasamo ang emosyon sang mga pumuluyo sang pungsod Japan matapos ang kadalag-an batok sa Colombia sa FIFA World Cup 2018 sa Russia.
Suno kay Bombo Radyo international correspondent Josel Palma direkta sa Japan, ginakabig sang mga Japanese nga bulahan ang ila national football team nga labing una nga Asian team nga nakalutos sa South American team sa FIFA World Cup.
Naghilinugyaw kag naghibi suno kay Palma ang mga Japanese.
Dugang pa ni Palma, bug-os ang suporta sang pungsod sa ila national team.
Nakabulig man suno kay Palma ang kadalag-an sang Japan football team agud maghagan-hagan ang kalisod sang mga pumuluyo sang Osaka nga sang damlag lang gintay-og sang magnitude 5.9 nga linog kun sa diin apat ang patay samtang madamo ang napilasan.
Nahibaluan nga ang goalkeeper sang Japan nga si Masaaki Higashigushi kag ang midfielder nga si Hotaru Yamaguchi ang nagahampang para sa Osaka samtang ang attacking midfielder nga si Keisuke Honda ang ginbun-ag sa Osaka Prefecture.