Masobra 30 ka mga salakyan nga naga-obstruct sa dalan sa Iloilo City Proper ang naisyuhan sang ticket sa una nga adlaw sang pagpatigayon sang road clearing operations.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga may yara pa sang iban nga team nga nakadeploy sa iban nga distrito nga may separado nga nahatagan sang tickets kag may yara man sang naisyuhan sang ticket ang Land Transporation Office (LTO).
Suno kay Conlu, magluwas sa naga-illegal park nga mga salakyan, may yara man sang mga talipapa, tiangge, kag iban pa nga lapaw nga mga atop sang mga balay nga nagasabad sa dalanon.
Ginpahayag ni Conlu nga mas compliant subong ang mga punong barangay bangud nahangpan nila nga ginamonitor sang maayo sang Department of the Interior and Local Government ang ila nga performance.
Kun indi makapasar ang barangay sa rating sang amo nga ahensya, may igahatag nga show cause order sa punong barangay agud mapaathag kun ano ang kakulangan sa Oplan Hawan Karsada.
