ILOILO CITY – Compliant ang mga punong barangay may kaangtanan sa pagpatuman sang minimum health protocol sa syudad sang Iloilo.
Ini ang pahayag ni Mayor Jerry Treñas nga baliskad naman sa nauna nga pahayag ni Fernando Jose “Boyet” Rico, Executive Assistant for Barangay Affairs kag miyembro sang Complaince Team, nga may mga Punong Barangay nga wala nagapasa sang accomplishment report.
Sa interview sang Bombo Radyo kay Treñas, iya ginpahayag nga wala naga-untat ang kampanya sang Iloilo City Government agud malimitahan ang paglapta sang COVID-19 kag ini ang dapat nga mag-umpisa sa barangay level.
Suno kay Treñas, ang tagsa ka Punong Barangay ang nagatinguha gid sa pagpatuman sang COVID-19 response ilabi na sa mga lugar nga ginakabig nga hot spot areas.
Matapos nga gin-deputize ang mga barangay official agud makapangdakop sang violator, ginpahayag sang alkalde nga positibo ang feedback nga iya nabaton.
Apisar sini, gin-ako sang alkalde nga may mga residente gid man nga dungol nga wala nagasunod sa minimum health protocol.
