ILOILO CITY – 50% pa lang sang mga punong barangay sa syudad sang Iloilo ang nakapaidalom sa COVID-19 test.
Ini ang ginkumpirma sa Bombo Radyo ni Punong Baragay Roberto Niño sang Calumpang, Molo kag spokesperson sang Liga ng mga Barangay sa syudad sang Iloilo.
Suno kay Niño, may yara pa sang schedule sang swabbing, buwas, Setyembre 21, 1:30 pm-2:30 pm sa Diamond Jubilee Hall.
Ginpahayag ni Niño nga ang iban sa mga punong barangay ang nakabaton na sang resulta sang ila nga RT-PCR test samtang may iban naman nga nagahulat pa lang.
Sa subong suno kay Niño, nagsaka na sa tatlo ka mga punong barangay ang nalatnan sang COVID-19 apang wala niya ginhingadlan kun sin-o ang nagdugang nga opisyal.
Ginakabig naman ni Niño nga decision tool sa pagpatuman sang surgical ukon total lockdown ang resulta sang COVID-19 test.
Ang mga barangay nga may na record nga 3 ukon masobra pa nga COVID-19 cases ang ipaidalom na sa selective lockdown depende sa assessment sang COVID-19 team.
Nagalaum ang Punong Barangay nga masolusyunan ang tuman ka atrasado nga pagpaguwa sang resulta agud nga indi man mag-agunto ang mga apektado nga residente.
May yara naman sang igahatag nga death benefits ang Liga ng mga Barangay para sa mga opisyal sang barangay nga nagtaliwan.
Ang tagsa ka elected kag appointed official ang kinahanglan nga magbayad sang P100 nga seed money kag ang matipon nga kantidad ang iga-amot sa pamilya sang nagtaliwan nga opisyal sang barangay.
May yara man sang igahatag nga separado nga amot ang Liga ng mga Barangay magluwas pa sa benepisyo nga ihatag sang Iloilo City Government kag iban pa nga ahensya sang gobyerno nga kinahanglan pa nga iproseso sang pamilya.
